परसदा म फैंसी स्टोर के ताला तोड़ के चोर मन नकद लेगे, घटना सीसीटीवी म रिकॉर्ड

कुम्हारी/ राकेश सोनकर की रिपोर्ट

परसदा गांव के सखी सहेली फैशन पॉइंट म 11 जुलाई के रात करीब 1 बजे चोर मन शटर के ताला तोड़ के गल्ला म रखे नकद ल चोरी कर लीन। ए घटना दुकान म लगे सीसीटीवी कैमरा म रिकॉर्ड घलो हो गे हे।

दुकान चलाइया ह बताइन के 10 जुलाई के रात करीब 9 बजे दुकान बंद कर के अपन घर चले गे रिहिस। ओकर बाद चोर मन आधी रात करीब 1 बजे बस्ती जावइया रद्दा कोति लगे शटर ल तोड़ के दुकान के अंदर घुसरिन अऊ गल्ला म रखे करीब 15 हजार रुपिया ल चोरी कर लीन।

ए पूरा घटना दुकान के बाहिर अऊ अंदर लगे सीसीटीवी कैमरा म रिकॉर्ड हो गे हे, जेमा तीन लइका दिखत हें। एखर आधार म चोर मन के खिलाफ कुम्हारी थाना म सिकाइत दर्ज कराए गे हे।