कुम्हारी। विचक्षण जैन विद्यापीठ म पढ़ईया मन के लीडरशिप ल बढ़ाए बर इन्वेस्टिचर सेरेमनी के बड़का आयोजन करे गिस। ए मउका म स्कूल के प्राचार्य ए. पी. सिंह अउ ‘लाइफ एजुकेयर’ के मुखिया वेंकटेश अय्यर उपस्थित रिहिन।
कार्यक्रम के सुरुआत मंगलाचरण अउ दिया बार के करे गिस। ओखर बाद पढ़ईया मन के प्रतिनिधि मंडल के चुनाव अउ सपथ ग्रहण समारोह पूरा होइस। ए समारोह म देशना पगारिया ल हेड गर्ल अउ भाव्य जैन ल हेड बॉय चुने गिस। दुनो झन ह ईमानदारी, सेवा, लीडरशिप अउ अपन काम के प्रति सच्चा रहे के सपथ लिन।
वेंकटेश अय्यर ह अपन गोठ म कहिन कि – “एक सच्चा नेता ओ हरे, जउन पहिली अपन आप ल अनुशासित करथे अउ फेर दूसर मन ल हिम्मत देथे।” ओ ह पढ़ईया मन ल जिम्मेदार नागरिक बने बर प्रेरित करिन।
प्राचार्य ए. पी. सिंह ह चुने गे जम्मो पढ़ईया नेता मन ल बधाई देवत कहिन कि – “ये मउका सिरिफ एक पद नो हे, बलुक जिम्मेदारी निभाए बर हरे। आप जम्मो झन स्कूल के मान बढ़ावव। “आखिर म जम्मो बड़े पाहुना अउ मास्टर मन ह पढ़ईया नेता मन ल सुभकामना दिन अउ संग म प्राचार्य ए. पी. सिंह ह स्कूल प्रबंधन के आभार मानिन, जिनखर साथ, देखरेख अउ प्रेरणा ले ये आयोजन बने ढंग ले पूरा हो सकिस।
