भिलाई, दुर्ग: दुर्ग जिला म सड़क दुर्घटना ले होवइया मउत के सिलसिला थमे के नांव नइ लेवत हे. ए घांव एक तेज रफ्तार अंजान ट्रक ह एक नवा बिहाव करे जोड़ा ल अपन सिकार बना लिस. स्कूटी म सवार होके जावइया ए दू झन ल पाछू ले ठोकर मारे के बाद ट्रक चालक फरार हो गे, जेखर सेती दू नो झन के घटनास्थल म ही दुखद मउत हो गे.
ए हृदयविदारक घटना रविवार रात करीब 11:30 बजे खुर्सीपार तलहानाला फ्लाईओवर ब्रिज के तीर म होईस. भिलाई के कोहका निवासी मुकेश कुर्रे अपन पत्नी कामेश्वरी कुर्रे के संग रायपुर ले अपन घर कोहका लहुटत रहिन, तभे पाछू ले आए एक अंजान ट्रक ह ओ मन ल कुचल दिस.
पुलिस ह जांच सुरु करिस, परिजन मन चक्काजाम करिन
घटना के बाद स्थानीय मन तुरंत पुलिस ल खबर करिन. खुर्सीपार पुलिस टीम घटनास्थल म पहुंचिस अऊ मरे मन के पहचान करके ओ मन के परिजन मन ल बताइस. पुलिस ह लस मन ल अपन कब्जा म लेके पोस्टमॉर्टम बर लाल बहादुर शास्त्री शासकीय अस्पताल भेज दिस हे.
ए दुखद खबर ले हक्का-बक्का परिजन घलो घटनास्थल म पहुंच गीन अऊ आरोपी ट्रक चालक के तुरंत गिरफ्तारी अऊ कारवाही के मांग ल लेके चक्काजाम कर दीन. पुलिस ह परिजन मन ल समझा-बुझा के स्थिति ल सांत करिस, जेखर बाद चक्काजाम खतम होईस.
जानकारी के मुताबिक, मरे मुकेश सुपेला म एक प्रिंटिंग प्रेस म काम करत रहिन. ए नवदंपति रविवार के अपन मौसी के घर रायपुर गए रहिन अऊ ओती ले रात के घर लहुटत रहिन, तभे ए हादसा हो गे. खुर्सीपार पुलिस ह मामला दर्ज कर लिस हे अऊ फरार ट्रक ड्राइवर के खोज म लगे होईस हे.
