रायपुर, छत्तीसगढ़: आगु विधानसभा अऊ लोकसभा चुनाव के बाद कांग्रेस के राष्ट्रीय अध्यक्ष मल्लिकार्जुन खड़गे के राजधानी रायपुर म ये पहिली बड़ जनसभा होही, जेकर बर साइंस कॉलेज मैदान म पानी ले बचे बर तीन डोम बनाए गए हे. कांग्रेस प्रदेश प्रभारी सचिन पायलट ह इतवार के सभा जगा के जायजा घलो लिस. ये आयोजन के माध्यम ले कांग्रेस ह अपन संगठन ल फेर ले सक्रिप कर के अऊ पार्टी म छाए गुटबाजी के आरोप ल खारिज करे के कोसिस करत हे, जेकर तहत सबो बड़े नेता मन ल एक मंच म लाने के कोसिस करे जाही. फेर, पानी गिरे अऊ खेती-किसानी के दिन के मारे सभा म भीड़ जुटाना कांग्रेस बर एक चुनौती वाला काम हो सकत हे.
सबले महत्तम बात ये हे के जनसभा के बाद कांग्रेस अध्यक्ष ह पहिली पइत पार्टी मुख्यालय राजीव भवन म बैठक घलो करही, जेमा माने जात हे के सिरिस नेतृत्व ल मिले सिकायत मन के निपटारा करे जाही. खड़गे ह राजधानी म जनसभा के बाद संगठनात्मक बैठक के माध्यम ले प्रदेश के बड़ नेता अऊ पदाधिकारी मन के संग भविष्य के रणनीति मा गोठियाही. जनसभा के बेरा प्रदेश कांग्रेस के सबो दिग्गज मन ल एक साथ लाके एकजुटता के संदेस दे के कोसिस होही, वइसने बैठक के जरिये दिस-निरदेस के संग पदाधिकारी मन ल सक्रिप करे जाही.
विस्तारित कार्यकारिणी म परदरसन के समीक्षा
सभा के बाद, राष्ट्रीय अध्यक्ष ले अलग-अलग प्रतिनिधिमंडल भेंट करही. बस्तर म कथित फर्जी मुठभेर म मारे गए ग्रामीण आदिवासी मन के पीड़ीत परिवार घलो कांग्रेस अध्यक्ष ले मिलके अपन बात रखही. कांग्रेस ह ये मुद्दा मन ल राष्ट्रीय स्तर म उठाए के तियारी म हे.
प्रदेश कांग्रेस के विस्तारित कार्यकारिणी के बैठक म राष्ट्रीय अध्यक्ष ह संगठन के पूरा गतिविधि के समीक्षा करही. ये बेरा वोहा पदाधिकारी मन के परदरसन के घलो ब्यौरा लेही. अइसे अतकला हे के प्रदेश संगठन म होवइया नवा नियुक्ति मन ल लेके घलो वोहा कुछू संकेत दे सकत हे. ये पहिली मौका होही जब कोनो राष्ट्रीय अध्यक्ष ह कोनो प्रदेश इकाई के कार्यकारिणी अऊ जिला अध्यक्ष मन के बैठक लेके सीधा दिस-निरदेस दिही. ये बैठक म सबो पदाधिकारी मन ल तय रणनीति के तहत महत्तम काम सौंपे जाही. एकर अलावा, पॉलिटिकल अफेयर्स कमेटी के बैठक म कांग्रेस अध्यक्ष ह प्रदेश के बड़ नेता मन ल एकजुटता के संग राज्य सरकार के खिलाफ अभियान सुरु करे बर कड़ा निरदेस दे सकत हे.
