कुम्हारी। दुर्ग पुलिस ह एक हफ्ता पहिली होए मोबाइल लूटपाट अऊ विरोध करे म होए हत्या के मामला म चार आरोपी अऊ एक नाबालिग ल गिरफ्तार कर ले हे. गिरफ्तार करे गे आरोपी मन म कुम्हारी के दू जवान घलो सामिल हे.
पुलिस ह वारदात म उपयोग करे गे चाकू, लूटे गे मोबाइल, नकद रूपिया अऊ घटना म उपयोग करे गे स्कॉर्पियो कार ल घलो जब्त कर ले हे.
दुर्ग पुलिस के प्रवक्ता पद्मश्री तंवर ह बताइस के 3 जुलाई के रात म ग्राम जंजगिरी निवासी राजकुमार यादव (20 बछर) उपर उतई के डूंडेरा मोरिद मेन रोड के तीर कुछु अनजान जवान मन ह मोबाइल लुटे के कोसिस म चाकू अऊ पेचकस ले जानलेवा हमला करे रिहिस.
गंभीर रूप ले घायल राजकुमार ल अस्पताल ले जाए गिस, जिहां इलाज के बेरा ओकर मउत हो गिस.
सीसीटीवी फुटेज अऊ मोबाइल नंबर मन ले मिलिस सुराग
आरोपी मन के पता लगाए बर पुलिस ह आस-पास के लगभग 150 सीसीटीवी कैमरा के फुटेज खंगाले अऊ करीबन 1500 मोबाइल नंबर के जांच करिस. जांच के बेरा एक मनखे ह बताइस के घटना के बेरा स्कॉर्पियो म बइठे आरोपी मन ह ओला घलो लुटे के नियत ले दउड़ाये रिहिस. राजकुमार ह घलो अपन बयान म ए बात के जिक्र करे रिहिस.
येही सबूत मन के आधार म पुलिस ह लोकेश सारथी उर्फ भांचा (19 बछर) निवासी रामनगर, कुम्हारी, राजकिशोर वैष्णव उर्फ छोटू (20 बछर) निवासी रामनगर, कुम्हारी, उमेश टंडन (19 बछर) निवासी चंद्रमा चौक, खुर्सीपार, अऊ महाराज देवार ल पकड़िस. पूछताछ म आरोपी मन लूटपाट के जुर्म ल कबूल कर लिस.
आरोपी मन ह बताइस के ओ मन अपन स्कॉर्पियो ले मोरिद आवत रिहिन, तभे रद्दा म एक जवान ल स्कूटी खड़ा कर मोबाइल म बात करत देखिन. सब्बो आरोपी मन मिल के ओकर मोबाइल लुटे के कोसिस करिन.
लूट के विरोध करे म करिन जानलेवा हमला
जब राजकुमार ह लूट के विरोध करिस, त आरोपी मन ओकर संग हाथापाई सुरु कर दिन. ओ मन मिल के मारपीट करिन अऊ पेचकस ले ओकर छाती म कतको वार करिन. येही बेरा एक आरोपी ह अपन तीर रखे चाकू ले घलो ओकर उपर कतको वार करिस, अऊ मोबाइल लुट के भाग गइन.
पूछताछ म आरोपी मन ह ये घलो बताइस के ये घटना के बाद ओही दिन ओ मन एक हाईवा ड्राइवर ल घलो रोक के ओकर संग लूटपाट के घटना ल अंजाम दे रिहिन.
पुलिस प्रवक्ता ह जानकारी दिस के गिरफ्तार आरोपी मन के हिस्ट्री शीट तियार करे जावत हे अऊ ये मामला म फरार आने आरोपी मन के घलो तलाश जारी हे.
गिरफ्तार आरोपी:
* लोकेश सारथी उर्फ भांचा (19 बछर), रामनगर, कुम्हारी
* राजकिशोर वैष्णव उर्फ छोटू (20 बछर), रामनगर, कुम्हारी
* उमेश टंडन (19 बछर), चंद्रमा चौक, खुर्सीपार
* निखिल ठाकुर उर्फ विक्की चौधरी, तीन दर्शन मंदिर, छावनी
* एक अपचारी बालक
