कुम्हारी। केडिया डिसलरी म ठेकेदारी म काम करके अपन घर लहुटत मजदूर मन ले भरे मालवाहक गाड़ी अउ ट्रैक्टर म भिड़ंत हो गीस, जेखर ले बहुतेच मजदूर मन घायल हो गे। ए दुर्घटना गुरुवार के रात करीबन 7:30 बजे खपरी पंचदेवरी रद्दा के बीच होइस।
कुम्हारी थाना प्रभारी पी डी चंद्रा ले मिले जानकारी के मुताबिक, रात 7 बजे काम ले अपन गाँव मोहरेंगा अउ दारगाँव लहुटत मजदूर मन ले भरे मालवाहक महिंद्रा जीतो प्लस गाड़ी क्रमांक CG 07 CO 1690 उलटा दिशा ले आवत ट्रैक्टर क्रमांक CG 07 BU 3301 ले टकरा गीस। एखर ले मालवाहक गाड़ी म बइठे 15 मजदूर मन घायल हो गे।
सबो घायल मन ला गाँव वाले मन के मदद ले तीर के सामुदायिक स्वास्थ्य केंद्र म इलाज बर लाये गीस, जेमां ले 8 मजदूर मन ला इलाज बर रायपुर के मेकाहारा अस्पताल भेजे गीस, जिहां ओ मन के इलाज चलत हे। देर रात पुलिस ह वाहन मन ऊपर कार्रवाई करत चालक मन ऊपर BNS के धारा 281, 125(क), 110 अउ MV एक्ट के धारा 184 अउ 185 के तहत कार्रवाई करिस। दुनों चालक मन ह एक-दूसर के खिलाफ रिपोर्ट दर्ज करवाये हें।
बता दन कि कतको बछर ले आस-पास के गाँव मन ले मजदूर मन ला मालवाहक गाड़ी मन म अलग-अलग जगह म मजूरी बर लाये जाथे। जेमा कुम्हारी म घलो बहुत अकन मजदूर मन ला खुल्ला गाड़ी मन म भर के लाये जाथे। येखर पहिली घलो कतको गाड़ी मन दुर्घटनाग्रस्त हो चुके हे, जेमां मनखे मन के मौत घलो हो चुके हे।
गंभीर रूप ले घायल मन म ए मन सामिल हें:
श्रीमती चमेली साहू, श्रीमती दुलारी विश्वकर्मा, श्रीमती शिवानी सेन, श्रीमती मालती सिंह, श्रीमती जानकी सिन्हा, श्रीमती मानवती सिंह, श्रीमती बुधवंतीन साहू, श्रीमती कमला साहू अउ श्रीमती भगवती साहू।