कुम्हारी। स्वामी आत्मानंद अंग्रेजी माध्यम विद्यालय जंजगिरी पिछले बछर कस ए बछर घलो सैनिक स्कूल प्रवेश परीक्षा 2025 म आठवीं कक्षा के कुंजला साहू, चित्रांशी निर्मलकर, अऊ पूर्वांश वर्मा के चयन हो के स्कूल के नांव ऊँच करिन।
एकरे संग जंजगिरी म ए परीक्षा म गे 3 बछर म सैनिक स्कूल म चयनित होवईया विद्यार्थी मन के संख्या बढ़त जावत हे।
प्राचार्य श्रीमती मिनी गोपीनाथन ह बताइन कि सैनिक स्कूल प्रवेश परीक्षा के मेंटर शिक्षिका अंजना सिंह के कुशल मार्गदर्शन म हर बछर लइका मन सफलता के नवा कहानी लिखत हें। ए प्रतियोगी परीक्षा मन के ए खास बात हे कि एकर तैयारी ले नवा-नवा विद्यार्थी मन हर बछर लाभान्वित होत हें।
मेंटर अंजना सिंह ह बताइन कि प्रतियोगी परीक्षा म सफलता पा के लइका मन ल एक अलग किसम के आत्मविश्वास मिलथे। शिक्षिका ह तीनों लइका मन अऊ ओखर माता-पिता ल ए सफलता बर बधाई दीन। संग ही जे लइका मन ल सफलता नइ मिलिस हे, ओ मन घलो निराश झन होवें अऊ भविष्य म सफलता बर लगातार परियास करंय।
विद्यार्थी मन के ए सफलता ले स्कूल के सबो शिक्षक-शिक्षिका मन अऊ लइका मन के पालक मन घलो खुस हें।
